ନୂଆଦିଲ୍ଲୀ: କଂଗ୍ରେସ ଅଧ୍ୟକ୍ଷ ପଦବୀରେ ରହିବେ ନାହିଁ ବୋଲି ରାହୁଲ ଗାନ୍ଧୀ ଘୋଷଣା କରିଛନ୍ତି। ବୁଧବାର ୟୁପିଏ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ଅଧ୍ୟକ୍ଷତାରେ କଂଗ୍ରେସର ଲୋକସଭା ସଂସଦୀୟ ଦଳ ବୈଠକ ବସିଥିଲା। ଏଥିରେ ଦଳର ଅଧ୍ୟକ୍ଷ ରାହୁଲ ଗାନ୍ଧୀଙ୍କ ସମେତ ୫୧ ସାଂସଦ ଉପସ୍ଥିତ ଥିଲେ। ସେମାନେ ରାହୁଲଙ୍କୁ ଇସ୍ତଫା ଦେବାର ନିଷ୍ପତ୍ତି ପ୍ରତ୍ୟାହାର କରିନେବାକୁ ଅନୁରୋଧ କରିଥିଲେ। କିନ୍ତୁ ରାହୁଲ ତାହା ଶୁଣି ନ ଥିଲେ। ସେ କଂଗ୍ରେସ ଅଧ୍ୟକ୍ଷ ପଦରେ ରହିବାକୁ ଚାହୁଁ ନ ଥିବା କହିଥିଲେ।
ଏହା ସହିତ ଇସ୍ତଫାକୁ ନେଇ ରାହୁଲ ପ୍ରଥମ ଥର ପାଇଁ ଗଣମାଧ୍ୟମରେ ନିଜର ମତ ରଖିଛନ୍ତି। ସେ କହିଛନ୍ତି, ଆଜିର ବୈଠକରେ ମୁଁ ଅଧ୍ୟକ୍ଷ ପଦକୁ ନେଇ ରହିଥିବା ମୋର ଆଭିମୁଖ୍ୟ ସ୍ପଷ୍ଟ କରିଦେଇଛନ୍ତି। ମୁଁ ଅଧ୍ୟକ୍ଷ ଭାବେ ରହିବାକୁ ଚାହୁଁନାହିଁ। କଂଗ୍ରେସ ସାଂସଦ ଶଶି ଥରୁର ଏବଂ ମନୀଷ ତିୱାରୀ ରାହୁଲଙ୍କୁ ଅଧ୍ୟକ୍ଷ ରହିବା ଲାଗି ଯୁକ୍ତି ବାଢ଼ିଥିଲେ। ଦଳର ପରାଜୟର କାରଣ କେବଳ ଆପଣ ନୁହନ୍ତି, ବରଂ ସାମୁହିକ ଦାୟିତ୍ଵ। କିନ୍ତୁ ରାହୁଲ ପରାଜୟ ପାଇଁ ନିଜକୁ ଦାୟୀ କରି ଇସ୍ତଫା ଦେବାର ନିଷ୍ପତ୍ତିକୁ ପୁଣି ଥରେ ଦୋହରାଇଥିଲେ। ଅନ୍ୟପଟେ ଯୁବ କଂଗ୍ରେସର ସଦସ୍ୟମାନେ ରାହୁଲଙ୍କୁ ଭେଟିବା ଲାଗି ତାଙ୍କ ବାସଭବନ ସମ୍ମୁଖରେ ଏକତ୍ର ହୋଇଛନ୍ତି। ସେମାନେ ରାହୁଲଙ୍କୁ ଇସ୍ତଫା ନିଷ୍ପତ୍ତି ପ୍ରତ୍ୟାହାର କରିବାକୁ ନିବେଦନ କରିଛନ୍ତି। ସେପଟେ ବହୁ ସମର୍ଥକ ରାସ୍ତାକୁ ଆସି ରାହୁଲଙ୍କୁ ଦଳର ଅଧ୍ୟକ୍ଷ ରହିବା ଲାଗି ନିବେଦନ କରିଛନ୍ତି।