ୟୁକ୍ରେନ ପରେ ଋଷ ଟାର୍ଗେଟରେ ଉତ୍ତର ୟୁରୋପ । ନାଟୋ ମେମ୍ବରସିପକୁ ନେଇ ଫିନଲାଣ୍ଡକୁ ଚେତାବନୀ ଦେଇଛି ଋଷ। ଫିନଲାଣ୍ଡ ନାଟୋରେ ସାମିଲ ହେଲେ ଏହା ଋଷ-ଫିନଲାଣ୍ଡ ସମ୍ପର୍କକୁ ପ୍ରଭାବିତ କରିବ ଓ ଏହାଦ୍ୱାରା ଉତ୍ତର ୟୁରୋପରେ ସ୍ଥିରତା ଓ ସୁରକ୍ଷାକୁ ଅତ୍ୟଧିକ ପ୍ରଭାବିତ କରିବ ବୋଲି ଋଷ ବୈଦେଶିକ ମନ୍ତ୍ରଣାଳୟ ପକ୍ଷରୁ କୁହାଯାଇଛି।
ଋଷ-ଫିନଲାଣ୍ଡ ମଧ୍ୟରେ ୧୩ଶହ କିମି. ଲମ୍ବର ସୀମା ରହିଛି। ଏହି ଦୃଷ୍ଟିରୁ ଫିନଲାଣ୍ଡ ସବୁବେଳେ ନିରପେକ୍ଷ ରହିଥାଏ। କିନ୍ତୁ ୟୁକ୍ରେନ ଉପରେ ଋଷ ଆକ୍ରମଣ କରିବା ପରେ ନାଟୋରେ ସାମିଲ ହେବାକୁ ନିଷ୍ପତ୍ତି ନେଇଛି ଫିନଲାଣ୍ଡ। ଫିନଲାଣ୍ଡର ଏହି ନିଷ୍ପତ୍ତିକୁ ନେଇ ପୂର୍ବରୁ ଚେତାବନୀ ଦେଇଥିଲେ ଋଷ ରାଷ୍ଟ୍ରପତି ଭବନ କ୍ରେମଲିନର ପ୍ରବକ୍ତା ।
ଖୁବଶୀଘ୍ର ନାଟୋରେ ସାମିଲ ହେବାକୁ ଆବେଦନ କରାଯିବ ବୋଲି ଫିନଲାଣ୍ଡ ପ୍ରଧାନମନ୍ତ୍ରୀ ଓ ରାଷ୍ଟ୍ରପତି ଘୋଷଣା କରିଥିଲେ। ନାଟୋରେ ସାମିଲ ହେବା ଦ୍ୱାରା ଫିନଲାଣ୍ଡର ସୁରକ୍ଷା ମଜଭୁତ ହେବ ବୋଲି ରାଷ୍ଟ୍ରପତି କହିଛନ୍ତି। ସେପଟେ ସ୍ୱିଡେନ ବି ନାଟୋ ସଦସ୍ୟତା ପାଇଁ ଆବେଦନ କରିବ ବୋଲି ନିକଟରେ ଘୋଷଣା କରିଛି । ଅନ୍ୟପଟେ ଋଷ ବିରୋଧରେ ପୁରା ବିଶ୍ୱକୁ ଏକଜୁଟ୍ କରିବା ପାଇଁ ଆମେରିକା ଲଗାତାର ଭାରତ ସହ ସମ୍ପର୍କରେ ରହିଛି ବୋଲି ହ୍ୱାଇଟ୍ ହାଉସ ପକ୍ଷରୁ କୁହାଯାଇଛି।