ଭୁବନେଶ୍ୱର : ମହିଳାମାନଙ୍କର ବିକାଶ ହେଲେ ଦେଶର ବିକାଶ ହୋଇପାରିବ । ଏଥି ସହ ତୃଣମୂଳ ସ୍ତରରେ ବସବାସ କରୁଥିବା ସମସ୍ତ ମହିଳା ଗୋଟିଏ ପ୍ଲାଟ୍ଫର୍ମ ମାଧ୍ୟମରେ ଯୋଡ଼ି ହୋଇ ନିଜର ଅଧିକାର ସମ୍ବନ୍ଧରେ ଜାଣିବା ନିହାତି ଆବଶ୍ୟକ । ଆବାଳ ବୃଦ୍ଧ ବନିତାଙ୍କ ପାଇଁ କେନ୍ଦ୍ର ସରକାର ଅନେକ କଲ୍ୟାଣକାରୀ ଯୋଜନା କରିଛନ୍ତି । ସେହି ଯୋଜନା ସମ୍ବନ୍ଧରେ ଜାଣିବା ସହ ପ୍ରକୃତ ହିତାଧିକାରୀଙ୍କ ପାଖରେ ଯୋଜନାଗୁଡିକୁ ସୋସିଆଲ ମିଡିଆ ମାଧ୍ୟମରେ ପହଞ୍ଚାଇବା ପାଇଁ ବିଜେପି ମହିଳା ମୋର୍ଚ୍ଚା ମହାଅଧିବେଶନର ପ୍ରଥମ ଦିନର ସୋସିଆଲ ମିଡିଆ ବୈଠକରେ ମହିଳା ମୋର୍ଚ୍ଚାର ରାଷ୍ଟ୍ରୀୟ ଅଧ୍ୟକ୍ଷା ବିଜୟା ରାହତକର କହିଛନ୍ତି । ଶ୍ରୀମତୀ ରାହତକର୍ କହିଛନ୍ତି, ଦିନକୁ ଦିନ ସୋସିଆଲ୍ ମିଡିଆର ଶକ୍ତି ବୃଦ୍ଧି ପାଉଛି । ଗାଁଠୁ ସହର ପର୍ଯ୍ୟନ୍ତ ଏବେ ସମସ୍ତେ ସୋସିଆଲ ମିଡିଆରେ ସକ୍ରିୟ ଅଛନ୍ତି । ଏହାକୁ ଆଧାର କରି କେନ୍ଦ୍ରୀୟ ଯୋଜନା ଲୋକଙ୍କ ପାଖରେ ପହଞ୍ଚିବ । ରାଜ୍ୟ ବିଜେପି ମହିଳା ମୋର୍ଚ୍ଚାର ସମସ୍ତ କାର୍ଯ୍ୟକର୍ତ୍ତା ଏହି ଦାୟିତ୍ୱ ହାତକୁ ନେଇ କାର୍ଯ୍ୟ କରିବେ ।
ଦଳର ସଙ୍ଗଠନକୁ ମଜବୁତ କରିବା ପାଇଁ ସୋସିଆଲ ମିଡିଆର ଭୂମିକା ଗୁରୁତ୍ୱପୂର୍ଣ୍ଣ ବୋଲି ଶ୍ରୀମତୀ ରାହତକର କହିଛନ୍ତି । ଆଜି ଏକ ବିଶାଳ ସ୍କୁଟି ଶୋଭାଯାତ୍ରାରେ ମହିଳା ମୋର୍ଚ୍ଚାର ରାଷ୍ଟ୍ରୀୟ ଅଧ୍ୟକ୍ଷା ଶ୍ରୀମତୀ ରାହତକରଙ୍କୁ ବିମାନବନ୍ଦରରୁ ଦଳୀୟ କାର୍ଯ୍ୟାଳୟ ପର୍ଯ୍ୟନ୍ତ ପାଛୋଟି ଅଣାଯାଇଥିଲା । ଶତାଧିକ ସଂଖ୍ୟାରେ ଛାତ୍ରୀ, ଯୁବତୀ ଓ ମହିଳାମାନେ ଏକାଠି ହୋଇ ଶ୍ରୀମତୀ ରାହତକରଙ୍କୁ ସ୍ୱାଗତ କରିଥିଲେ । ଦଳୀୟ କାର୍ଯ୍ୟାଳୟରେ ଶ୍ରୀମତୀ ରାହତକର ପହଞ୍ଚି ସୋସିଆଲ ମିଡିଆ ବୈଠକରେ ଉପସ୍ଥିତ ରହି ସୋସିଆଲ ମିଡିଆର ଗୁରୁତ୍ୱ ଏବଂ ମହିଳାମାନଙ୍କୁ ସେମାନଙ୍କର କର୍ତ୍ତବ୍ୟ ସମ୍ବନ୍ଧରେ ବୁଝାଇଥିଲେ । ପରେ ଶ୍ରୀମତୀ ରାହତକର ଭଦ୍ରକର ଚରମ୍ପାରେ ଆୟୋଜିତ ଉଜ୍ଜଳାର ରୋଷେଇ କାର୍ଯ୍ୟକ୍ରମରେ ଯୋଗ ଦେଇଥିଲେ । ଆସନ୍ତାକାଲି ମହିଳା ଅଧିବେଶନର ଦ୍ୱିତୀୟ ଅଧିବେଶନ ଅନୁଷ୍ଠିତ ହେବ । ଏହି ବୈଠକରେ ମହିଳା ମୋର୍ଚ୍ଚାର ସମସ୍ତ ପଦାଧିକାରୀ, ଜିଲ୍ଲା ସଭାପତି, ଜିଲ୍ଲା ପରିଷଦ ପ୍ରାର୍ଥୀ, ନିର୍ବାଚିତ ପଞ୍ଚାୟତ ପ୍ରତିନିଧିଙ୍କ ବରିଷ୍ଠ ନେତାମାନେ ଯୋଗ ଦେବେ ।