ଭୁବନେଶ୍ୱର : ଛତିଶଗଡ଼ରେ ପୁଣି ମାଓ ହମଲା । ନିର୍ବାଚନ ଯେତିକି ପାଖେଇ ଆସୁଛି, ଲାଲବାହିନୀ ସେତେ ଅଧିକରୁ ଅଧିକ ରକ୍ତମୁଖା ହେବାରେ ଲାଗିଛି । ବିଜାପୁରରେ ଲ୍ୟାଣ୍ଡ ମାଇନ୍ ବିସ୍ଫୋରଣର ୩ ଦିନ ପରେ ଆଜି ଦାନ୍ତେୱାଡ଼ାରେ କରିଛନ୍ତି ଆମ୍ବୁସ୍ । ଯେଉଁଥିରେ ୨ ସିଆରପିଏଫ୍ ଯବାନ ସହିଦ୍ ହୋଇଥିବା ବେଳେ କ୍ରସ୍ ଫାୟାରରେ ଟଳି ପଡ଼ିଛନ୍ତି ଜଣେ ଗଣମାଧ୍ୟମ ପ୍ରତିନିଧି ।
ନିର୍ବାଚନ ପୂର୍ବରୁ ଛତିଶଗଡ଼ରେ ରକ୍ତମୁଖା ଲାଲବାହିନୀ । ବିଜାପୁର ପରେ ଦାନ୍ତେଓ୍ବାଡ଼ାରେ ବଡ଼ ଧରଣର ମାଓ ହମଲା । ଏଥର ସୁରକ୍ଷାକର୍ମୀଙ୍କ ସହ ଗଣମାଧ୍ୟମ ପ୍ରତିନିଧିଙ୍କୁ କଲେ ଟାର୍ଗେଟ୍ । ଆରନପୁର ନିକଟରେ ସିଆରପିଏଫ୍ ଯବାନଙ୍କୁ ଅତର୍କିତ ଆକ୍ରମଣ କରିଥିଲେ ମାଓବାଦୀ । ଯେଉଁଠି କ୍ରସ୍ ଫାୟାରରେ ଟଳି ପଡ଼ିଛନ୍ତି ଦୂରଦର୍ଶନର ଭିଡିଓ ଜର୍ଣ୍ଣାଲିଷ୍ଟ ଅଚ୍ୟୁତାନନ୍ଦ ସାହୁ। ସିଆରପିଏଫ୍ ଏସଆଇ ରୁଦ୍ରପ୍ରତାପ, ଆସିଷ୍ଟାଣ୍ଟ କନଷ୍ଟେବଲ୍ ମଙ୍ଗଳୁ ସହିଦ୍ ହୋଇଛନ୍ତି । ଆଉ ୨ ଜଣ ଯବାନ ଆହତ ହୋଇଛନ୍ତି ।
ଗତ ଶନିବାର ବିଜାପୁରରେ ଲାଲ୍ ବାହିନୀର ଲ୍ୟାଣ୍ଡମାଇନ୍ ବିସ୍ଫୋରଣରେ ୪ ସି.ଆର୍.ପି.ଏଫ୍ ଯବାନ୍ ସହିଦ୍ ହୋଇଥିବା ବେଳେ ୨ ଜଣ ଆହତ ହୋଇଥିଲେ । ଯେଉଁମାନଙ୍କ ମଧ୍ୟରେ ଓଡ଼ିଆ ଯବାନ୍ ବ୍ରଜମୋହନ ବେହେରା ଥିଲେ ।