କେନ୍ଦ୍ରାପଡ଼ା : ଯାତ୍ରା ଦେଖା କାଳ ହେଲା, ଦୁର୍ଘଟଣା ନେଲା ୫ ଜୀବନ । କେନ୍ଦ୍ରାପଡା ଜିଲ୍ଲା ଡେରାବିଶର ଅଁଳାବାଙ୍କ ଛକ ନିକଟରେ ମର୍ମନ୍ତୁଦ ଦୁର୍ଘଟଣା । ଗାଡିରେ ଥିବା ଅନ୍ୟଜଣେ ଯାତ୍ରୀ ଗୁରୁତର ଭାବେ ଆହତ ହୋଇଛନ୍ତି | ତଙ୍କୁ କଟକ ସ୍ଥାନାନ୍ତର କରାଯାଇଛି । ରବିବାର ବିଳମ୍ବିତ ରାତିରେ ଜାତୀୟ ରାଜପଥରେ କାର୍ ଦୁର୍ଘଟଣା ଗ୍ରସ୍ତ ହୋଇଛି । ଦୁର୍ଘଟଣା ଏତେ ଭୟଙ୍କର ଥିଲା ଯେ, ଗାଡିର ଆଗ ପଟ ସଂପୂର୍ଣ୍ଣ ନଷ୍ଟ ହୋଇ ଯାଇଛି । ଘଟଣା ସ୍ଥଳରେ ହିଁ ପାଞ୍ଚ ଜଣଙ୍କର ମୃତ୍ୟୁ ହୋଇଯାଇଛି । ମୃତକ ମାନେ ହେଲେ ରାଜନଗର ଗୁପ୍ତିର ରାଜେଶ ଜେନା,ପଟ୍ଟାମୁଣ୍ଡାଇ ବେଲତଳର ଦେବାଶିସ୍ ସେଠି, ଅନୁଗୁଳର ସଂଗ୍ରାମୀ ମଲିକ ଓ ଗାଡି ଚାଳକ ତ୍ରିଷୁ ସାହୁ । ଦୁର୍ଘଟଣା ପରେ ଗାଡିଟି ଚିପି ହୋଇ ଯାଇଥିବାରୁ ଆଗ ସିଟ ରେ ବସିଥିବା ଗାଡି ଡ୍ରାଇଭର୍ ଓ ଅନ୍ୟଜଣେ ଯାତ୍ରୀଙ୍କୁ ଗ୍ୟାସ୍ କଟର ସାହାଯ୍ୟରେ କାଟି ବାହାର କରିବାକୁ ପଡିଥିଲା | ଦୁର୍ଘଟଣା ଗ୍ରସ୍ତ ଗାଡିଟି ରାସ୍ତା କଡରେ ଛିଡା ହୋଇଥିବା କୌଣସି ଗାଡିର ପଛ ପଟରେ ପିଟି ହୋଇଥିବାର ଅନୁମାନ କରାଯାଉଛି | ଦୁର୍ଘଟଣାଗ୍ରସ୍ତ ଯାତ୍ରୀମାନେ କେନ୍ଦ୍ରାପଡ଼ା ରୟାଲ ଡ୍ୟାନ୍ସ ଗ୍ରୁପ ର ବୋଲି ଜଣାପଡିଛି | ପାଣିକୋଇଲି ଠାରେ ଯାତ୍ରା ଦେଖିବାକୁ ଯାଇ ଫେରୁ ଥିବା ବେଳେ ସେମାନେ ଦୁର୍ଘଟଣାର ଶିକାର ହୋଇଛନ୍ତି ।