ଭୁବନେଶ୍ୱର: ରାଜ୍ୟ ସରକାର ଲୋକଙ୍କୁ ବିନା ମୂଲ୍ୟରେ ଗୁଣାତ୍ମକ ସ୍ୱାସ୍ଥ୍ୟସେବା ପ୍ରଦାନ କରୁଥିବାବେଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କାର୍ଯ୍ୟକାରୀ କରୁଥିବା ୫-ଟି ଯୋଗୁଁ ଏହା ଅଧିକ କ୍ରିୟାଶୀଳ ହୋଇପାରିବ ବୋଲି ଓଡିଶା ଗସ୍ତରେ ଆସିଥିବା କେନ୍ଦ୍ରୀୟ ଅନୁଧ୍ୟାନ ମିଶନ ମତ ଦେଇଛନ୍ତି । ଡାକ୍ତର ହିମାଂଶୁ ଭୂଷଣଙ୍କ ଅଧ୍ୟକ୍ଷତାରେ ଆସିଥିବା ଏହି କମିଟି ଗତ ୧୭ ତାରିଖରୁ କନ୍ଧମାଳ ଓ ମୟୁରଭଞ୍ଜର ବିଭିନ୍ନ ଅଞ୍ଚଳ ଗସ୍ତ କରି ସ୍ୱାସ୍ଥ୍ୟସେବା ସଂକ୍ରାନ୍ତରେ ଅନୁଧ୍ୟାନ କରିଥିଲେ । ଗସ୍ତ ସମୟରେ ସେମାନଙ୍କର ବିଭିନ୍ନ ସ୍ୱାସ୍ଥ୍ୟଅନୁଷ୍ଠାନର ପର୍ଯ୍ୟବେକ୍ଷଣ ଓ ମନ୍ତବ୍ୟ ଉପସ୍ଥାପନ କରିଥିଲେ । ଏହି ଗସ୍ତ କାଳରେ ସେମାନେ ସମ୍ପୃକ୍ତ ଜିଲ୍ଲାର ମୁଖ୍ୟ ଚିକିତ୍ସାଳୟ ଉପଖଣ୍ଡ ଚିକିତ୍ସାଳୟ, ଗୋଷ୍ଠି ସ୍ୱାସ୍ଥ୍ୟକେନ୍ଦ୍ର, ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର,
ହେଲ୍ଥ ୱେଲନେସ୍ ସେଣ୍ଟର, ଅଙ୍ଗନବାଡି କେନ୍ଦ୍ର, ବିଭିନ୍ନ ଗ୍ରାମ ପରିଦର୍ଶନ କରିଥିଲେ । ଡାକ୍ତର, ପାରାମେଡିକ୍, ଆଶା, ଅଙ୍ଗନବାଡିକର୍ମୀ, ପଞ୍ଚାୟତିରାଜ ଅନୁଷ୍ଠାନର ସଦସ୍ୟମାନଙ୍କ ସହିତ ଆଲୋଚନା କରିବା ସଂଗେ ସଂଗେ ଗ୍ରାମସଭାରେ ମଧ୍ୟ ଯୋଗ ଦେଇଥିଲେ । ବିଭିନ୍ନ ସ୍ୱାସ୍ଥ୍ୟ ଅନୁଷ୍ଠାନ ଗୁଡିକର ରେକର୍ଡ ଯାଞ୍ଚ କରିବା ସହିତ ରୋଗୀ, ସେମାନଙ୍କର ସହାୟକ ଏବଂ ସାଧାରଣ ଲୋକଙ୍କ ସହିତ ସ୍ୱାସ୍ଥ୍ୟସେବା ବ୍ୟବସ୍ଥା ନେଇ ଆଲୋଚନା କରିଥିଲେ । ତାଙ୍କରି ଉପସ୍ଥାପନା କାଳରେ ସେମାନେ ଲୋକମାନଙ୍କୁ ବିନାମୂଲ୍ୟରେ ଗୁଣାତ୍ମକ ସ୍ୱାସ୍ଥ୍ୟସେବା ଯୋଗାଇ ଦେବାର ଉଦ୍ୟମକୁ ଉଚ୍ଚ ପ୍ରଶଂସା କରିଛନ୍ତି । ସ୍ୱାସ୍ଥ୍ୟସେବା କ୍ଷେତ୍ରରେ ଭିତ୍ତିଭୂମିର ବିକାଶ, ସଫା ସୁତୁରା ବ୍ୟବସ୍ଥା, ନିରାମୟ ମାଧ୍ୟମରେ ମାଗଣା ଔଷଧ ପ୍ରଦାନ, ନିଦାନ ମାଧ୍ୟମରେ ମାଗଣା ରୋଗ ନିରୂପଣ, ମାଗଣା ଡାଏଲିସିସ୍ ଏବଂ କର୍କଟରୋଗୀଙ୍କୁ କେମୋଥେରାପି ଆଦିକୁ ବିଚାରକୁ ନେଇଥିଲେ । ଆନୁଷ୍ଠାନିକ ପ୍ରସବ ହାର ବୃଦ୍ଧି ଓ ସମ୍ପୂର୍ଣ୍ଣ ଟୀକାକରଣ, ଶିଶୁ ମାତୃ ମୃତ୍ୟୁହାର ହ୍ରାସ, ୱେଲନେସ୍ ସେଣ୍ଟର, ଅଣ ସଂକ୍ରାମକ ରୋଗ ନିୟନ୍ତ୍ରଣ କାର୍ଯ୍ୟକାରିତା ନେଇ ସେମାନେ ପ୍ରଭାବିତ ହୋଇଛନ୍ତି ।
ସେହିପରି ବିଭିନ୍ନ କ୍ଷେତ୍ରରେ ତାଲିମପ୍ରାପ୍ତ ମାନବସମ୍ବଳ ବ୍ୟବସ୍ଥା, ମଧୁମେହ ଏବଂ ରକ୍ତଚାପ ଔଷଧ ମିଳିବା, ଆରଏନ୍ଟିସିପି, ଏନଭିବିଡିସିପି କାର୍ଯ୍ୟକ୍ରମ ସୁନ୍ଦରଭାବେ ଚାଲିଥିବା ସେମାନେ କହିଛନ୍ତି । ସେହିପରି ଉକ୍ରୃଷ୍ଟମାନର ସେବା ପାଇଁ ମାନବସମ୍ବଳ ପରିଚାଳନା, କାୟାକଳ୍ପ ପୁରସ୍କାର ପାଇବା ଓ ଲକ୍ଷ୍ୟ ସାର୍ଟିଫିକେଟ ମିଳିବା ପାରିଛି । ଓଡିଶା ମଧ୍ୟ ସହରାଞ୍ଚଳ ସ୍ୱାସ୍ଥ୍ୟ ମିଶନ କାର୍ଯ୍ୟକାରୀ କରିବା କ୍ଷେତ୍ରରେ ଉଲ୍ଲେଖନୀୟ ପଦକ୍ଷେପ ଗ୍ରହଣ କରିଛି । ସ୍ୱାସ୍ଥ୍ୟସେବାର କେତେକ କ୍ଷେତ୍ରରେ ମାନବ ସମ୍ବଳ ବୃଦ୍ଧି, ସ୍ୱାସ୍ଥ୍ୟସେବା ପ୍ରଦାନକାରୀଙ୍କର ତାଲିମ, ଜନସଚେତନତା ବୃଦ୍ଧି ପାଇଁ ଆଇଇସି କାର୍ଯ୍ୟକ୍ରମକୁ ଅଧିକ କ୍ରିୟାଶୀଳ କରାଯିବାଲାଗି କହିଛନ୍ତି ।
ଏହି ଅବସରରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର କମିଶନର ତଥା ଶାସନ ସଚିବ ଡାକ୍ତର ପ୍ରମୋଦ କୁମାର ମେହେର୍ଦ୍ଦା ତାଙ୍କର ମତାମତ ଦେଇ କହିଛନ୍ତି ଯେ ଟିମ୍ର ସଦସ୍ୟମାନେ ଯେଉଁସବୁ ପଏଣ୍ଟ ଉପରେ ତାଙ୍କର ମତାମତ ଦେଇଛନ୍ତି ସେ ସମ୍ପର୍କରେ ସ୍ୱାସ୍ଥ୍ୟ ବିଭାଗ ତରଫରୁ ଅନୁଶୀଳନ କରାଯାଇ ଆବଶ୍ୟକୀୟ ପଦକ୍ଷେପ ନିଆଯାଇଛି । ଜାତୀୟ ସ୍ୱାସ୍ଥ୍ୟମିଶନ ନିର୍ଦ୍ଦେଶିକା ଶାଳିନୀ ପଣ୍ଡିତ ଏହି ସିଆରଏମ୍ ଟିମ୍ର ଗସ୍ତ ନେଇ ତାଙ୍କର ଖୁସି ବ୍ୟକ୍ତ କରିବା ସହିତ ଟିମ୍ର ମତାମତ ଆଗାମୀ ଦିନରେ ରାଜ୍ୟର ସ୍ୱାସ୍ଥ୍ୟସେବା ବ୍ୟବସ୍ଥାକୁ ଅଧିକ ସୁଦୃଢ ଓ ଲୋକାଭିମୁଖୀ କରିବା ଦିଗରେ ସହାୟକ ହେବବୋଲି କହିଛନ୍ତି । ଅନ୍ୟମାନଙ୍କ ମଧ୍ୟରେ ରାଜ୍ୟ ମେଡିକାଲ ନିଗମ ଏମ୍ଡି ୟାମିନୀ ଷଡଙ୍ଗୀ, ଯୁଗ୍ମ ସଚିବ ଗୁହା ପୁନମ ତାପସ କୁମାର, ସ୍ୱତନ୍ତ୍ର ସଚିବ ଡାକ୍ତର ହରପ୍ରସାଦ ପଟ୍ଟନାୟକ, ସମସ୍ତ ନିର୍ଦ୍ଦେଶକ ଓ ଅନ୍ୟ ବରିଷ୍ଠ
ଅଧିକାରୀମାନେ ଉପସ୍ଥିତ ଥିଲେ ।