କନ୍ଧମାଳ: ବାଲିଗୁଡା ଥାନା ଅଂଚଳର ଜଣେ ନାବାଳିକା ଛାତ୍ରୀଙ୍କୁ ଅପହରଣ ଓ ଗଣଦୁଷ୍କର୍ମ ମାମଲାରେ ଦଣ୍ଡାଦେଶ ଶୁଣାଇଛନ୍ତି ଫୁଲବାଣୀ ଅତିରିକ୍ତ ଜିଲ୍ଲା ଦୌରାଜଜ୍ ତଥା ପୋକ୍ସ କୋର୍ଟ । ଅଭିଯୁକ୍ତ ବାଲିଗୁଡା ଖଜୁରିନାଳ ଦୁମୁଡିସାହିର ରଞ୍ଜିତ ସାହୁ ଓ ସିନ୍ଧ୍ରିଗାଁ ପାସେରିପଡାର ଅରୁଣ ସାହୁକୁ ଦୋଷୀ ସାବ୍ୟସ୍ତ କରି ୨୦ ବର୍ଷ ସଶ୍ରମ କାରା ଦଣ୍ଡାଦେଶ କରିଥିବା ବେଳେ ୫୭ ହଜାର ଟଙ୍କା ଜୋରିମାନା କରିଛନ୍ତି। ଏହି ମାମଲାରେ ଜଣକୁ କୋର୍ଟ ଖଲାସ ମଧ୍ୟ କରିଛନ୍ତି।
କୋର୍ଟଙ୍କ ସୂଚନା ଅନୁସାରେ ଦଶମ ଶ୍ରେଣୀରେ ପଢୁଥିବା ନାବାଳିକା ଜଣଙ୍କ ଗାଁ ଦାଣ୍ଡରେ ଖେଳୁଥିବା ସମୟରେ ଏହି ଦୁଇ ଅଭିଯୁକ୍ତ ପିଡିତାର ପାଟି ବନ୍ଦ କରି ଉଠାଇ ନେଇଥିଲେ। ପରେ ମଟର ସାଇକେଲ ଓ କାରରେ ଜଙ୍ଗଲକୁ ନେଇ ଗଣଦୁଷ୍କର୍ମ କରିଥିଲେ। ଏହାପରେ ପଥରରେ ଛେଚି ହତ୍ୟା ଉଦ୍ୟମ କରିଥିଲେ। କିନ୍ତୁ ଅନ୍ୟ ଜଣେ ପହଁଚି ଉଦ୍ଧାର କରିବାକୁ ଉଦ୍ୟମ କରିବାରୁ ତାକୁ ମଧ୍ୟ ମାଡ଼ ମାରି ଲହୁଲୁହାଣ କରିଥିଲେ ଦୁଇ ଅଭିଯୁକ୍ତ।
ଗୁରୁତର ଅବସ୍ଥାରେ ଉଭୟଙ୍କୁ ଗାଁ ଲୋକେ ଉଦ୍ଧାର କରି ବାଲିଗୁଡା ମେଡିକାଲରେ ଭର୍ତି କରିଥିଲେ । ପରେ ପରିବାରଲୋକେ ପହଁଚି ଏତଲା ଦାଏର କରିଥିଲେ। ୨୦୧୬ ମସିହା ଡିସେମ୍ବର ୨୨ ତାରିଖରେ ଘଟିଥିବା ଏହି ଘଟଣାରେ ଆଜି ରାୟ ପ୍ରକାଶ କରିଛନ୍ତି ମାନ୍ୟବର କୋର୍ଟ । ମୋଟ ୧୫ ଜଣ ସାକ୍ଷୀଙ୍କ ପ୍ରମାଣଙ୍କୁ ଭିତି କରି କୋର୍ଟ ଏହି ରାୟ ପ୍ରକାଶ କରିଛନ୍ତି ।